၁၉ ဂျူလိုင် အမှတ်တရ . .

မိမိကိုယ်တိုင် မြင်မသွားခဲ့ရသော မြန်မာနိုင်ငံ လွတ်လပ်ရေးအတွက် လန်ဒန်မြို့တွင် အရေးဆိုခဲ့စဉ်က . .

(၆၃)နှစ်တောင်မှ ကြာညောင်းခဲ့ပါပြီ။ ဒီနေ့ ဒီရက် လွန်ခဲ့တဲ့ (၆၃)နှစ်ဆီက မြန်မာတစ်မျိုးသားလုံးအတွက် လုံး၀ အစားထိုးလို့ မရတဲ့ ဆုံးရှုံးမှုကြီး တစ်ခု ဖြစ်ခဲ့ပါတယ်။ ဒီကိစ္စတော့ ဗိုလ်ချုပ်အောင်ဆန်း နဲ့ နိုင်ငံခေါင်းဆောင်ကြီးတွေ တစ်ဖွဲ့လုံး လုပ်ကြံသတ်ဖြတ် ခံလိုက်ရတာပါဘဲ။ တစ်မျိုးသားလုံး ဖြေမဆည် နိုင်အောင် ကြေကွဲဝမ်းနဲ ခဲ့ရပါတယ်။

ဒါပေမယ့် ဒီဆောင်းပါးမှာ သမိုင်းဖြစ်ရပ်ကို ရေးသားမှာ မဟုတ်ဘဲ အာဇာနည်ခေါင်းဆောင်ကြီး “ဗိုလ်ချုပ်အောင်ဆန်း” ရဲ့ နာမည် နဲ့ ကံကြမ္မာ တို့ကို မြန်မာ့ရိုးရာ ဗေဒင်ပညာရပ် နဲ့ ဂဏန်းဗေဒင်(Numerology) ရှုထောင့် များမှ သုံးသပ်တင်ပြလိုခြင်းသာ အဓိက ဖြစ်ပါတယ်။

“ပေါက်ဖေါ်” လို့ ခေါ်ကြတဲ့ “ဖြစ်ရပ်တစ်ခုကို (ပြီးခါမှ) ဗေဒင် ပညာနဲ့ သုံးသပ်ကြတာဟာ အထင်ကြီးစရာ မဟုတ်ပေမယ့် ဒီလို အတိတ်က ကိစ္စတွေကို များများလေ့လာ သုံးသပ် နိုင်မှ အမှားနည်းပြီး အမှန်များလာနိုင်မှာဖြစ်ပါတယ်။ အတိတ်ဟာ အနာဂါတ် အတွက် ဆရာကောင်းဘဲ မဟုတ်ပါလားဗျာ။

ဗိုလ်ချုပ်အောင်ဆန်းဟာ ၁၉၁၅ခု၊ ဖေဖေါ်ဝါရီလ (၁၃)ရက် (စနေနေ့) မှာ ဖွားမြင်ခဲ့ပါတယ်။ “ရာဇ”ဖွား ဖြစ်ပါတယ်။ သူ့ရဲ့ မဟာဘုတ် က (၂)ကြွင်းမဟာဘုတ် ဖြစ်ပါတယ်။

(၂)ကြွင်း မဟာဘုတ်တို့ရဲ့ ယေဘူယျ ဉာဉ်တွေအတိုင်း ဗိုလ်ချုပ်ဟာ ငယ်ငယ်ကတည်းက –

– ခေါင်းမာတယ်။ တစ်ယူသန်တယ်။ ကိုယ့်ကိုယ်ကို အလွန်အမင်း ယုံကြည်တယ်။ ဆုံးဖြတ်ချက် ပြတ်သားတယ်။ သူများရဲ့ အကြံပေးစကားတွေကို မနာခံတတ်ဘူး။ ပတ်ဝန်းကျင်ကို ဂရုသိပ် မစိုက်ဘူး။ အနေအထိုင် ဖြစ်သလို နေထိုင်တတ်တယ်။ အဝတ်အစားကို သပ်သပ်ရပ်ရပ် မဝတ်ဘူး။ သူများကို အလွန်ကူညီတတ်မယ်။ မရှိ ရှိတာ နဲ့ ကူညီမယ်။ လက်အောက်ငယ်သားအပေါ် (အပြောကြမ်းတတ်)ပေမယ့် အလွန်ငဲ့ညှာ သနားတတ်တယ် . . . ဆိုတဲ့ ဂုဏ်ပုဒ်တွေ ရှိပါတယ်။

ဗိုလ်ချုပ်ရဲ့ ခေါင်းမာတဲ့ စရိုက် နဲ့ ကိုယ့်ကိုယ်ကို ယုံကြည်လွန်ခြင်း ဆိုတဲ့ စိတ်ထားတွေကြောင့် လုံခြုံရေး အစောင့်အရှောက်ရယ် လို့ ဟုတ်တိ ပတ်တိ မထားခဲ့ တာဟာ ရန်သူတွေကို အလွန်လွယ်ကူစွာ လုပ်ကြံနိုင်စေဖို့ ဖန်တီးပေးသလို ဖြစ်ခဲ့ပါတယ်။

နောက်ပြီး ရာဇဖွား။ ဘယ်အကြွင်းဘဲဖြစ်ဖြစ် ရာဇဖွားမှန်ရင် “ထက်မြက်ခြင်း၊ ပြတ်သားခြင်း၊ ကိုယ်စွမ်းကိုယ်စ မြင့်မားခြင်း၊ တုန်းတိုက်တိုက် ကျားကိုက်ကိုက် ပြုလုပ်တတ်ခြင်း၊ သူရသတ္တိနဲ့ ပြည့်စုံခြင်း” စ,တဲ့ သဘာဝတွေ ရှိပါတယ်။

နောက်ပြီး သင်္ချာဗေဒ (ဂဏန်းဗေဒင်) ရှုထောင့်က ကြည့်တောလည်း (13)ရက် ဆိုတော့ (4) ဂဏန်း သမား။ “(4)ဂဏန်း သမားများ အကြောင်း တစေ့တစောင်း” ဆောင်းပါးမှာ ကျွန်တော်ရေးခဲ့သလိုဘဲ (4)ဂဏန်းဟာ တော်တော်ဆန်းကြယ်တဲ့ ဂဏန်းတစ်ခုပါ။ (4) ဂဏန်းသမားတွေဟာ လူ့လောကထဲမှာ တော်တော်ထင်ပေါ်ကျော်ကြားကြတာ များပါတယ်။ အရည်အချင်းလည်း ရှိကြတယ်။ ပါးနပ်တယ်။ သိလွယ်တတ်လွယ်တယ်။ အတိတ် ပါရမီဓာတ်ခံ တစ်ခုခု ရှိတတ်တယ်။

ဖေဖေါ်ဝါရီလ (13)ရက်နေ့ဟာ သာယနစနစ်မှာ တနင်္ဂနွေ “ကုံ” ရာသီမှာ တည်ရှိနေတာကြောင့် ဗိုလ်ချုပ်ဟာ “ကုံ” ရာသီဖွား ဖြစ်ပါ တယ်။ “ကုံ” ရာသီရုပ်ဟာ “ရေထမ်းသမား ရေအိုးထဲမှ ရေများကို သွန်လောင်းချနေတဲ့ ပုံ” ဖြစ်ပါတယ်။ ဒီရာသီခွင် ရုပ်ပုံကို သရုပ်ဖော်ကြည့်ရင် ကုံရာသီသမားတွေဟာ –

“စွန့်လွှတ်ခြင်း၊ အနစ်နာခံခြင်း၊ မိမိလုပ်သမျှ ကိုင်သမျှ အချည်းအနှီးဖြစ်ခြင်း၊ သဲထဲရေသွန် ဖြစ်ခြင်း၊ မိမိပြုလုပ်ခဲ့သော်လည်း မိမိပြန်မခံစားရခြင်း၊ အဆုံး သတ်မကောင်းလှခြင်း စတဲ့ အဓိပ္ပါယ် ဖွင့်ဆိုချက်တွေရှိတဲ့ ရာသီဖြစ်ပါတယ်။ ဒါကြောင့် “ကုံ” ရာသီဖွား (13)ဂဏန်းသမားဖြစ်တဲ့ ဗိုလ်ချုပ်အောင်ဆန်းဟာ မိမိရဲ့ ကြိုးပမ်း အားထုတ်မှု များရဲ့ အသီးအပွင့်များကို မြင်ပင် မမြင်လိုက်ရဘဲ ဝမ်းနည်း ကြေကွဲဖွယ်ရာ ကွယ်လွန် သွားရခြင်းမျိုး ဖြစ်ပါတယ်။

“ကုံ” ရာသီဟာ ခေတ်သစ် သင်္ချာဗေဒမှာ “ယူရေးနပ်စ်ဂြိုဟ်(4)ဂဏန်း” ပိုင်တဲ့ “ကသစ်” အိမ် ဖြစ်လို့ သူ့ပိုင်တဲ့ အိမ်မှာ သူရပ်တည်တဲ့ (13)ဂဏန်းဟာ ဒီနေ့မှာ မွေးဖွားတဲ့ လူတစ်ယောက်ကို အလွန်ထက်မြက်တဲ့ စွမ်းရည်၊ အရည်အချင်းတွေကို ဖြည့်ဆည်းပေးလိုက်တာ မဆန်းလှပါဘူး။ ဒါပေမယ့် ကံမကောင်းတဲ့ အချက်တစ်ချက်က “သူ” ဟာ “စနေ” သား ဖြစ်နေပြန်တယ်။ (4)ဂဏန်း ပိုင်တဲ့ ယူရေးနပ် ဂြိုဟ် နဲ့ စနေဂြိုဟ် တို့ဟာ တကယ့် ကမ္ဘာရန်တွေ ဖြစ်ပါတယ်။

ဒီလို (4)ဂဏန်းသမားတစ်ယောက်ဟာ ရန်ဂြိုဟ်ဖြစ်တဲ့ စနေနေ့မျိုးမှာမွေးဖွားလာရင် သူတို့ရဲ့ ဘဝတစ်လျှောက်လုံးဟာ တည်ငြိမ် အေးချမ်းမှု မရှိတော့ဘဲ “ပဋိပက္ခ” ဖြစ်စဉ်တွေ နဲ့ အမြဲလိုလို ရင်ဆိုင်နေရသူတွေ ဖြစ်ပါတယ်။ သူတို့ဟာ အရာရာကို အလွယ်တကူ နဲ့ ရလေ့မရှိဘဲ “တိုက်ယူမှ ရသူတွေ” ဖြစ်တယ်။ အိမ်ထောင်ရေး အဆင်မပြေမှုတွေကိုလည်း ရင်ဆိုင်ရလေ့ရှိတယ်။

Numerology ပညာအရ ဗိုလ်ချုပ်ကို “သတ်” လိုက်တဲ့ ဂြိုဟ်ဟာ (13)ဂဏန်း ဖြစ်တယ်လို့ တစ်ချို့က ယူဆကြပါတယ်။ မဟုတ်ပါဘူး။ “သေမင်း” လို့ အဓိပ္ပါယ်ရှိပြီး လူအများ ကြောက်ကြတဲ့ (13)ဂဏန်းဟာ အခြားသူများကိုတော့ “သတ်ချင်သတ်မယ်” ။ ကိုယ့်မွေးဂဏန်း ပိုင်ရှင်ကိုတော့ သတ်လေ့မရှိပါဘူး။

Numerology ပညာအရ ဗိုလ်ချုပ်ကို အသေသတ်လိုက်တာကတော့ “သင်္ချာဗေဒပညာ” ရဲ့ လျှို့ဝှက်ချက်တစ်ခုဖြစ်တဲ့ “Current of Destiny” ကြောင့် ဖြစ်ပါတယ်။ ဗိုလ်ချုပ်ဟာ 1915 ခုနှစ်မှာ မွေးဖွားတော့ သူ့ရဲ့ Current က (16)ဂဏန်း ဖြစ်နေပါတယ်။ တကယ်တော့ “Current of Destiny” ဆိုတာ “တားရော့” ပညာပါဘဲ။ တားရော့ဗေဒင်မှာ (16)ဆိုတဲ့ ဂဏန်းဟာ လူတစ်ယောက် မျှော်စင်ပေါ်ကနေ မိုးကြိုးပစ်ခံရပြီး ပြုတ်ကျလာတဲ့ နိမိတ်ပုံပါ။

ဒီ နိမိတ်ပုံဟာ မျှော်စင်ဆိုတဲ့ အထွဋ်အထွပ်ကို ရောက်နေတဲ့ လူတစ်ယောက်ကို မိုးကြိုးပစ်ချခံလိုက်ရတာဆိုတော့ “အမြင့်ဆုံးကို ရောက်နေစဉ်မှာ ပြုတ်ကျခြင်း၊ မီး လျှပ်စစ် , ပေါက်ကွဲစေတတ်သော ပစ္စည်းများကြောင့် ဒုက္ခတွေ့ခြင်း ၊  ရုတ်တရက် အငိုက်မိ တိုက်ခိုက်ခံရခြင်း၊ မမျှော်လင့်သော ကံကြမ္မာဆုံး ဗြုန်းကနဲ ကျရောက်ခြင်း၊ သဘာ၀ ဘေးအန္တရာယ်များနှင့် ကြုံတွေ့ခြင်း များကို ဆိုလိုပါတယ်။

ဒါကြောင့် “Current of Destiny” (16) ဖြစ်နေခြင်း ၊ ကုံရာသီ (အသက်တိုတတ်သောရာသီ)တွင် မွေးဖွားခြင်း၊ စနေ နှင့် (4)ဂဏန်း ရန်ကျနေခြင်း စသော အချက်တွေ ပေါင်းဆုံသွားတဲ့အခါ  ဗိုလ်ချုပ်ဟာ ဥပစ္ဆေဒကကံ နဲ့ ကွယ်လွန်သွားရခြင်း ဖြစ်ပါတယ်။

နောက်တစ်ခုက ဗိုလ်ချုပ်အောင်ဆန်းရဲ့ နာမည် ကိစ္စ ။ ငယ်နာမည်က “မောင်ထိန်လင်း” တဲ့ ။ ဒါပေမယ့် ဒီနာမည်က မတွင်ဘူး။ တက္ကသိုလ် ကျောင်းသားဘဝမှာတော့ “ကိုအောင်ဆန်း” “သခင်အောင်ဆန်း” လို့ လူသိများလာတယ်။ နောက် ရဲဘော်သုံးကျိပ်အဖွဲ့ ခေါင်းဆောင်ဖြစ်လာတော့ “ဗိုလ်တေဇ”။

ဒီနေရာမှာ ကံတရားရဲ့ ထူးဆန်းမှုလေး တစ်ခုရှိပါတယ်။ ကျန်တဲ့ ရဲဘော်သုံးကျိပ်ဝင် အားလုံးနီးပါးလောက်ဟာ သူတို့ ရဲဘော်သုံးကျိပ် ဝင်တုန်းက နာမည် တွေဖြစ်ကြတဲ့ “ဗိုလ်နေဝင်း၊ ဗိုလ်ဗလ၊  ဗိုလ်လက်ယာ၊ ဗိုလ်စင်္ကြာ၊ ဗိုလ်ကျော်ဇော . . စတဲ့ နာမည်တွေကို ဆက်ယူကြပြီး ဒီ နာမည်တွေဟာ ဘဝတစ်လျှောက်လုံး အတည်ဖြစ် သွားခဲ့ကြပါတယ်။

ဗိုလ်ချုပ်ကတော့ “ဗိုလ်တေဇ” ဆိုတဲ့ နာမည်ကို ဆက်မယူဘဲ မူလ “ဗိုလ်အောင်ဆန်း” ဆိုတဲ့ နာမည်ကိုဘဲ ပြန်သုံးခဲ့ပါတယ်။  ဗိုလ်ချုပ်တစ်ယောက်ဘဲ ထူးထူးခြားခြား မူလနာမည်ကို ပြန်သုံးဖြစ်သွားပါတယ်။ ဒါဟာ ကံတရားတစ်ခုလို့ ဆိုနိုင်မလားခင်ဗျာ ?

မဟာဘုတ်သမား အတော်များများ သိကြတဲ့ အတိုင်း ဗိုလ်ချုပ်ဟာ (၂)ကြွင်းဖွား ဖြစ်လေတော့ “အောင်ဆန်း” ဆိုတဲ့ နာမည်ဟာ “အထွန်း+ပုတိ” ပက္ခတ် မိနေပါတယ်။ ပက္ခတ်တွေအကြောင်း ကျွန်တော်သေသေချာချာ လေ့လာကြည့်တော့ “ပက္ခတ်” တစ်ခု နဲ့ တစ်ခု အဆိုးပေးမှုခြင်း သိပ်မတူကြတာကို သွားတွေ့ရပါတယ်။ အောက်မှာ ကြည့်ပါ။