မနက်ဖြန် (6.2.2010)နေ့မှာ မြန်မာ့ရုပ်ရှင် အကယ်ဒမီ ဆုပေးပွဲ ကျင်းပမယ် ဆိုပါလား။ ရုပ်ရှင်အကယ်ဒမီဆုနဲ့ ပက်သက်ပြီး နီးစပ်ရာ အပေါင်းအသင်း တွေက ဒီနှစ် ဘယ်သူတွေ ရနိုင်လဲ မေးလာကြသဗျ။
အမှန်အတိုင်း ပြောရရင် မြန်မာရုပ်ရှင် မကြည့်ဖြစ်တာလည်း အနှစ် (၂၀)လောက် ရှိသွားပြီမို့ ဘယ်မင်းသမီး မင်းသားတွေက နာမည်ကြီးနေတယ် , ဘယ်ဇာတ်ကားတော့ ဘယ်လိုကောင်းတယ် ဆိုတာတွေလည်း မသိတော့ပါဘူး။ ဟိုတုန်းက ကြားဖူးတဲ့ “ထက်ထက်မိုးဦး” တို့ “ဒွေး” တို့ “နန္ဒာလှိုင်” တို့လောက်ကလွဲပြီး နောက်ပေါက် မင်းသား မင်းသမီး အသစ်တွေကိုလည်း မသိ တော့ပါဘူး။ နာမည်မှ ကောင်းကောင်း မသိတော့ ဘယ်သူရမယ်ဆိုတာ ခန့်မှန်းဖို့လည်း ခက်ပါတယ်။
ကျွန်တော်က “ဂီတ” ကို ဝါသနာ ကြီးသလောက် ရုပ်ရှင်ဘက်မှာတော့ အင်မတန် ဝါသနာ နည်းပါတယ်။
နောက်တစ်ခု အခက်အခဲက အနုပညာလောက (အထူးသဖြင့် ရုပ်ရှင်လောက) ထဲက လူတွေကလည်း အသက်ကို အမှန် မပြောချင်ကြဘူးဗျ။ ကျွန်တော်က သုတေသန ဝါသနာပါတော့ ထင်ပေါ်ကျော်ကြားသူတွေရဲ့ မွေးသက္ကရာဇ်တွေ လိုက်ပြီး စုဆောင်းတဲ့ နေရာမှာ အခက်အခဲဆုံးက “မြန်မာနိုင်ငံ” ဘဲဗျ။
ဘယ်နိုင်ငံက ထင်ပေါ်ကျော်ကြားသူဖြစ်ဖြစ် “အင်တာနက်” ပေါ်မှာ “ကလစ်” တစ်ချက်ခေါက်လိုက်တာနဲ့ သူ့ရဲ့ မွေးနေ့ သက္ကရာဇ် အပြည့်အစုံ နဲ့ ကိုယ်ရေးအထုပ္ပတ္တိကို အလွယ်တကူ သိနိုင်ပါတယ်။
