ကုန်ဈေးနှုန်း ဗေဒင်နဲ့ပတ်သတ်လို့ သိထားသမျှ

ဗေဒင်မိတ်ဆွေလေး ကိုရန်းဂန်းက တောင်းဆိုလို့ ကုန်ဈေးနှုန်း အတက်အကျနဲ့ပတ်သတ်တဲ့ ဗေဒင် တွက်နည်းလေးတွေကို တင်ပြဆွေးနွေး ပေးချင်ပါတယ်။ နောက်ကြောင်းကို ပြန်ပြောရရင် လွန်ခဲ့တဲ့ (၁၅) နှစ်လောက်တုန်းက ကျွန်တော်ဟာ ကုန်သည် နဲ့ ဆီစက် လုပ်ငန်းရှင်လေး တစ်ဦး ဖြစ်ခဲ့တော့ ဆိုတော့ ဒီဘာသာရပ်တွေကို တော်တော်လိုက်စားခဲ့ဘူးပါတယ်။ လက်ရိုး၊ လက်ဆန်း၊ သင်္ချာဗေဒ၊ ဟူးရား ဗေဒင် နည်းအမျိုးမျိုး၊ လမ်းအစုံစုံ နဲ့ နေ့မအိပ်၊ ညမအိပ်ကို တွက်ခဲ့ ချက်ခဲ့ဘူးပါတယ်။

အဲဒီတုန်းကတော့ဗျာ – ငယ်ရွယ်သူလည်းဖြစ် ၊ ကြီးပွားချမ်းသာချင်စိတ်ကလည်း အလွန်များခဲ့တော့ ကုန်ဈေးနှုန်း အတက် အကျ သာမက ယိုးဒယားချဲထီ တို့ ၊ ဘောလုံးပွဲတို့လည်း အသေအလဲ တွက်ခဲ့ တာပေါ့ဗျာ။ လုံးဝနီးပါး မှန်ကန်တဲ့ ဖော်မြူလာ တစ်ခုတော့ ကျိန်းသေ ရှိရမယ်လို့ ယူဆခဲ့တာပေါ့။

ဒါပေမယ့် အမှန် နဲ့ အမှား ပိန်မသာ၊ လိမ်မသာဖြစ်ရုံကလွဲပြီး သူဌေးလည်း ဖြစ်မလာခဲ့ပါဘူး။ မှန်ကန်တဲ့ ရာနှုန်းက နည်းပါတယ်။ နောက်ပိုင်း မှားတာက ပိုများလာလို့ လက်လျော့လိုက်ရပါတယ်။နောက်တော့မှ သိလာတာက ဒီလို မှန်ကန်တဲ့ ရာနှုန်း ဘာကြောင့် နည်းလာရသလဲဆိုရင် ဗေဒင်ပညာက မမှန်လို့ မဟုတ်ဘူး ဗျ။ “လောဘ” ဆိုတဲ့ နိမ့်ကျတဲ့စိတ်ကြောင့် အမှားများရတာပါ။အခုနေ လူတစ်ယောက်ကို ဗေဒင်တွက်ကြည့်။ အနည်းဆုံး (၇၅) ရာနှုန်းမှန်ရမယ်။ ဒါပေမယ့် အလောင်းအစားနဲ့ ပတ်သက်လာရင် “လောဘ” ပါလာတဲ့အတွက် ညစ်နွမ်းသွားပြီး အမှန်တရားတွေ ပျောက်ကွယ်လာရတာဖြစ်ပါတယ်။ မှန်ကန်မှု ရာနှုန်းဟာ (၅ဝ) ရာနှုန်း အောက်ကို ကျလာခဲ့တယ်။ (၅ဝ) ရာနှုန်းအောက် ကျပြီ ဆိုကတည်းက ရှုံးပြီပေါ့ဗျာ။ ဒီလိုသိလာတဲ့ အချိန်ကစပြီး အလောင်းအစားတို့၊ ကုန်လှောင်တာတို့ကို လုံးဝစွန့်လွှတ်ခဲ့ပါတယ်။ကုန်ဈေးနှုန်းတွက်တယ်ဆိုတာကလည်း နောက်ကွယ်မှာ ကုန်ပစ္စည်း သိုလှောင်ချင်တဲ့ လောဘ ပါနေတဲ့အတွက် မှန်ကန်တဲ့ ရာနှုန်း နည်းတတ်ပါတယ်။

ရိုးရိုးသားသား သိချင်လို့တွက်ကြည့်။ တကယ်ဟုတ်မဟုတ် ဒီအတိုင်း ထိုင်စောင့်ကြည့်။ မှန်နေလိမ့်မယ်။ တကယ် ကုန်လှောင် တော့မယ် ဆိုပြီးတွက်ကြည့်။ ထွက်တဲ့အဖြေအတိုင်း လှောင်ကြည့်။ ဟုတ်ချင်မှ ဟုတ်တော့မယ်။ မြတ်ချင်လည်း မြတ်လိမ့်မယ်။ ကွဲချင်လည်း ကွဲလိမ့်မယ်။ ကွဲဖို့ ပိုများတယ်။နောက်ဆုံး လူတွေရဲ့ဘဝကို အုပ်ချုပ်နေတာ ကံတရားပါဗျာ။ ကံကောင်းနေရင် ဘာလုပ်လုပ် အောင်မြင်နေတာဘဲ။ ကိုယ့်လက်နဲ့ ကိုင်မိသမျှဟာ ရွှေတုံးရွှေခဲတွေ ဖြစ်နေတော့တာဘဲ။ ကံများ နိမ့်လာရင် ရွှေတုံးရွှေခဲကို ကိုင်လိုက်ရင်တောင် မီးသွေး ဖြစ်သွားတတ်ပါတယ်။ ကိုယ့်ကြမ္မာကိုသာ ကိုယ်စီရင်လို့ရရင် ဗေဒင်ပညာရှင်တွေ၊ လောကီပညာရှင်တွေက အရင်ဆုံး သူဌေးဖြစ်ကြမှာ ပေါ့ဗျာ။ဒါပေမယ့်လည်း ဗေဒင်ပညာပိုင်းနဲ့ ပတ်သက်ပြီး ဗဟုသုတရကြအောင် နည်းလမ်းတစ်ချို့ကို တင်ပြဆွေးနွေးသွားပါမယ်။ ကုန်ဈေးနှုန်း ဗေဒင်ဆိုတာကလည်း အတော်ခက်သားဗျ။ ဥပမာ- လက်ရိုးနည်းနဲ့ ကြည့်ရင် သောကြာဂြိုဟ်ဟာ ချည်မျှင်၊ အထည်အလိပ် နဲ့ သကြား ကြံသကာတွေကို စိုးမိုးထားတဲ့ဂြိုဟ်လို့ ဆိုပါတယ်။ ဒါပေမယ့် တစ်ခါတစ်လေ ချည်ထည် ဈေးတက်ပြီး သကြားဈေးကျနေတာမျိုးလည်း ရှိတတ်တာဘဲ။ သီးနှံတစ်ခုကို ဂြိုဟ်တစ်လုံးက အုပ်စိုးတယ် ဆိုရင်တောင် မျိုးရင်းတစ်ခုထဲက မျိုးစိတ်တွေကို ဘယ်လို လုပ်ပြီး ခွဲမလဲ။ မြန်မာနိုင်ငံမှာ အလှောင်များတဲ့ “ပဲ” ကိုဘဲကြည့်။ ပဲတစ်မျိုး တည်းမှာကို ပဲတီစိမ်း၊ ပဲနောက်၊ မတ်ပဲ ၊ ကုလားပဲ၊ ပဲကြီး ၊ စားတော်ပဲ .. အများကြီးဘဲလေ။ အဲဒီ “ပဲ” ထဲမှာကို တစ်ခါတစ်လေ မတ်ပဲက ဈေးမြောက်နေပြီး၊ ကုလားပဲက ဈေးကျနေတာမျိုးလည်း ရှိတယ် မဟုတ်လား။ ဒီလို ခွဲခြားရတာ တော်တော် ခက်ပါတယ်။

ဒါပေမယ့် ကုန်ဈေးနှုန်း ကမောက်ကမဖြစ်ရတဲ့ အကြောင်းတွေနဲ့ ဂြိုဟ်တွေရဲ့ သဘောသဘာဝကိုတော့ နည်းနည်း သိထားရင် ကောင်းပါတယ်။ နက္ခတ်ဗေဒင်စနစ်မှာ ယူရေးနပ်စ်၊ စနေ၊ ကြာသပတေး နဲ့ အင်္ဂါ ဂြိုဟ်တွေဟာ ကုန်ဈေးနှုန်းတွေကို အတော် ကမောက် ကမဖြစ်အောင် လုပ်တတ်တဲ့ဂြိုဟ်တွေလို့ သိထားရမယ်။ဒီဂြိုဟ်တွေရဲ့ အသွားအလာ ၊ အမြင်အယှဉ်တွေဟာ ကုန်ဈေးနှုန်း အတက် အကျတွေကို အတော် လွှမ်းမိုးနိုင်မှု ရှိတာတွေ့ရတယ်။ အဲဒီနေရာမှာ အရှေ့တိုင်းမှာ သုံးတဲ့ဂြိုဟ်ပူးဂြိုဟ်မြင်ထက် အနောက်တိုင်းစနစ်မှာ သုံးတဲ့ ဂြိုဟ်မြင်စနစ်က ပိုပြီးမှန်တာကို (လက်တွေ့ လေ့လာ ဘူးတဲ့ အတွေ့အကြုံအရ) တွေ့ရပါတယ်။

အရှေ့တိုင်းစနစ်မှာတော့ (၁၈ဝံ) ဒီဂရီ သမသတ်အမြင်ကို သိပ်အဆိုးမပေး ပေမယ့် အနောက်တိုင်းမှာတော့ သိပ်ဆိုးတယ် လို့ယူဆပါတယ်။ နောက်တစ်ခုက (၉ဝံ) ဒီဂရီ စကွဲယားအမြင်။ သူလည်း ဆိုးတာဘဲ။ ဒီတော့ အထက်က ပြောတဲ့ စနေ၊ ယူရေးနပ်စ်၊ အင်္ဂါ နဲ့ ကြာသပတေးဂြိုဟ်တွေဟာ တစ်ခုနဲ့ တစ်ခု သမသတ်အမြင်၊ စကွဲယားအမြင်တွေ ဖြစ်တဲ့ အချိန်တွေမှာ ဈေးနှုန်းတွေဟာ ကမောက်ကမဖြစ်တတ်ပါတယ်။ ဈေးအလွန် ကစားတတ်ပါတယ်။ များသောအားဖြင့် ဈေးကျတာ များပါတယ်။ တစ်ခါတစ်လေကျပြန်တော့ လည်း မယုံနိုင်စရာကောင်းအောင် ခုန်တက်တတ်ပါတယ်။

လက်တွေ့တစ်ခုပြပါမယ်။ အခု သံဒိဌာန်ဂြိုဟ်သွားပြက္ခဒိန်အရ စနေဂြိုဟ် နဲ့ ယူရေးနပ်ဂြိုဟ်ဟာ “သမသတ်” အမြင်နဲ့ မြင်နေတာကို တွေ့ရပါမယ်။ အနောက်တိုင်းစနစ် သံဒိဌာန်ဂြိုဟ်သွားပြက္ခဒိန်မှာ စနေဂြိုဟ်ဟာ ကန်ရာသီမှာ (၁၉) ဒီဂရီ နဲ့ ယူရေးနပ်စ် ဂြိုဟ်က မိန်ရာသီမှာ (၁၈) ဒီဂရီ နဲ့ သမသတ် အတိအကျ ဖြစ်နေပါတယ်။ ဒီလို သမသတ်အမြင်ကို ချည်းကပ်လာခဲ့တဲ့ စက်တင်ဘာ၊ အောက်တိုဘာ လတွေလောက်ကတည်းက အမေရိကန်နိုင်ငံမှာ ဘဏ်တွေပျက်တာကစလို့ စီးပွားရေးကမောက်ကမဖြစ်၊ စတော့ ရှယ်ယာဈေးတွေ ထိုးကျခဲ့တာဖြစ်ပါတယ်။ ရေနံဈေးနှုန်း မယုံနိုင်လောက်အောင် ကျဆင်း သွားတာလည်း ဒီအမြင်ကြောင့် ဖြစ်နိုင်ပါတယ်။ ဒီလို စနေ နဲ့ ယူရေးနပ်အမြင်ဟာ အနှစ် (၅ဝ)လောက်မှ တစ်ကြိမ်သာ ဖြစ်နိုင်ပါတယ်။ဒီလို စနေ နဲ့ ယူရေးနပ်ဂြိုဟ်တို့ဟာ သမသတ် ဖြစ်တိုင်း၊ စကွဲယားဖြစ်တိုင်း၊ ဂြိုဟ်ပူးတိုင်း ကမ္ဘာ့ဈေးနှုန်းတွေ၊ စတော့ ရှယ်ယာဈေးတွေ အလွန်ကမောက်ကမ ဖြစ်တတ် တာကို တွေ့ရပါတယ်။

အနောက်တိုင်းဂြိုဟ်မြင်အရ (၁၂ဝ) ဒီဂရီ ဆိုတဲ့ (၅)တန့် (၉)တန့် အမြင်ကတော့ အမြင်ကောင်းဖြစ်တဲ့အတွက် ဂြိုဟ်တွေဟာ အဲဒီအမြင်ဖြစ်လာရင် ဒီအနေအထားကို ဂြိုဟ်တွေရောက်လာရင် ဈေးနှုန်းတွေဟာ မှန်မှန်တက်လာပြီး စိုက်ပျိုးသူ၊ ရောင်းဝယ်သူအားလုံး အကျိုးများတတ်ပါတယ်။

ဂြိုဟ်ပူးတာကတော့ သက်ဆိုင်ရာဂြိုဟ်အလိုက် ကောင်းခြင်းမကောင်းခြင်းဖြစ်စေပါတယ်။ အင်္ဂါ နဲ့ ကြာသပတေး ပူးရင် ယေဘူယျ ကောင်းဖို့များပြီး၊ အင်္ဂါ နဲ့ စနေ၊ အင်္ဂါ နဲ့ ယူရေးနပ်စ်၊ စနေ နဲ့ ယူရေးနပ်စ်တွေပူးရင် မကောင်းတတ်ပါဘူး။

ဒါတွေက နက္ခတ်ဗေဒင် ဆိုင်ရာအခြေခံတွေပါ။ အကျယ်ချဲ့ရရင်တော့ စာအုပ်တစ်အုပ်ဖြစ်သွားပါလိမ့်မယ်။ လက်ရိုးဗေဒင်စနစ် က ကျယ်ဝန်းလှပြီး နည်းဥပဒေက များလွန်းလို့ တော်တော်လေ့လာပြီး သုတေသနပြုမှ အမှန်များပြီး အမှားနည်းလာပါလိမ့်မယ်။

ဒီနေရာမှာ မြန်မာ့ရိုးရာနည်းစနစ်နဲ့ ကုန်ဈေးနှုန်း အတက်အကျ၊ ပစ္စည်း အပေါအရှားတွက်တာလေး တစ်ခုလောက် တင်ပြ ချင်ပါတယ်။ မြန်မာ့နည်းလေးတွေကတော့ လွယ်ကူတယ်။ အထင်ကြီးစရာမရှိဘူး။ ဒါပေမယ့် မှန်သင့်သလောက် မှန်တာပါဘဲ။ ဒီနည်း ကလေးကတော့ ကျွန်တော့်ရဲ့ ဗေဒင်မှတ်စုစာအုပ်ကလေးထဲမှာ လွန်ခဲ့တဲ့ (၁၈) နှစ်လောက်က မှတ်ထားခဲ့တဲ့ နည်းလေးဖြစ်ပြီး ဘယ်စာအုပ်ထဲကလဲ ဆိုတာတော့ မမှတ်မိတော့ပါဘူး။ ဆရာဒဂုန့်စာအုပ် ဖြစ်ဖို့တော့ များပါတယ်။ ဘာဖြစ်လို့လဲဆိုတော့ ဆရာဒဂုန်ရဲ့ စာအုပ်တွေက ကျွန်တော့်ဆီမှာ အများဆုံးဖြစ်နေလို့ပါ။ ဆရာဒဂုန်ဟာ ကျွန်တော့်ရဲ့ သင်ဆရာမဟုတ်ပေမယ့်၊ မြင်ဆရာတစ်ဦးပါ။ မြန်မာ့ဗေဒင်နည်းစနစ်တွေကို သူ့စာအုပ်တွေထဲက အများဆုံးရခဲ့ပါတယ်။ ဒီနည်းစနစ် ကလေးကတော့ ကုန်ပစ္စည်းတွေရဲ့ နံကို အောက်ပါ ဇယားအတိုင်းပေါင်းပြီး တွက်တဲ့နည်းပါ။ ကြည့်ကြရအောင်။